CEBU, Philippines – Gikwestyon sa konsehal sa oposisyon sa Dakbayan sa Sugbo kun unsa ang mga guidelines nga gitamdan sa pagpanghatag og tagsa ka sakong bugas sa mga habal-habal drivers ug Angkas sa siyudad. Atol sa regular session kagahapon sa Konseho, giaprubahan ang mosyon ni Konsehal Pastor Alcover, Jr. sa iyang privilege speech bahin sa distribusyon sa maong mga bugas.
“Daghan man gung nadawat natong mga tawag og nganong ang ubang habalhabal drivers, wala makadawat. Wala ko makatubag kay wala koy idea kun unsay procedure, unsay sistema, kinsay mo recognize sa habalhabal maong akong gihimo ang privilege speech to erase doubts,” matud pa niya atubangan sa Konseho.
Kahinumdoman nga niadtong Sabado, nangapud-apod og tagsa ka sakong bugas ang executive department sa siyudad sa mga kwalipikadong habalhabal ug Angkas drivers. Tumong sa siyudad nga maibanan ang kalisod nga epekto sa pagdeklarar sa Korte Suprema nga ilegal ang pagpamasahero gamit ang motorsiklo dinhi sa nasud.
Tungod niini, nigahin ang siyudad og P15 milyones aron ipalit sa maong mga bugas. Kagahapong adlawa, si Assistant City Administrator Annabeth Cuizon miingon nga kapin 1,400 ka sako nga bugas ang ilang nahatag.
Matud niya, kwalipikado lang kadtong dunay accomplished profile sheet; Commission on Elections Identification Card; proof of possession nga ilaha ang motorsiklo; certification nga ang maong drayber usa ka indigent; ug sakop kini sa bisan unsang habalhabal association.
Apan matud pang Alcover kinahanglang dunay lista ang Konseho sa mga benepisaryo niini ug ingon man guidelines aron ilang matubag kung dunay magpangutana.
“Transparency does not erase the doubts coming from people but it lessens the doubts. As a matter of public opinion, the government is always presumed to be guilty of corruption. That is why transparency is always an imperative of governance,” matud niya. (/IBM)(BANAT NEWS)