CEBU, Philippines – Ipahigayon ang unang quarter sa National Simultaneous Earthquake Drill karong Pebrero 21 sa alas 2:00 sa hapon ug pagahimuon kini ngadto sa Dakbayan sa Iloilo isip national pilot area ug ang rehiyonal nga pilot area sa Central Visayas pagahimuon sa Dakbayan sa Tagbilaran.
Si Engineer Ver Neil Balaba, pangulo sa Disaster Risk and Reduction Management (DRRM) Division sa Office of the Civil Defense (OCD)-7 nagkanayon nga kada quarter na ang maong earthquake drill.
Matud ni Balaba nga nahimong programa na karon sa OCD-7 ug sa National Disaster Risk and Reduction Management Council lakip sa uban nga rehiyonal nga DRRM council nga kada quarter na pagahimuon ang maong drill aron masulod sa huna-huna ug kasingkasing sa tibuok Pilipino nga kinahanglan ang tanan andam sa epekto sa linog.
Matud ni Balaba nga sa Holy Name University sa Dakbayan sa Tagbilaran pagahimuon ang pilot area sa Central Visayas.
Si James Andrew Andaya, DRMM focal person sa Department of Interior and Local Government (DILG)-7 nagkanayon nga gisusi nila ang mga kasamtangang ekipo sa mga LGU kabahin sa disaster preparedness and disaster response.
Si Amaryllis Villarmia, information officer sa Department of Education (DepEd)-7 nagkanayon nga sa niaging tuig adunay 3,872 nga eskwelahan ang nipahigayon ug miapil sa simultaneous earthquake drill pag-edukar sa mga estudyante sa pagpangandam sa katalagman. (/BDB)(BANAT NEWS)