CEBU, Philippines — Human ang usa ka tuig, gisikop ang suspek sa pagpanglugos sa Lungsod sa Balamban human niya amung-amongi ang iyang silingan.
Nasayran nga ang babayeng biktima, hingkod ang panuigon, giubanan sa iyang igsoun sa pagtaho sa nahitabo kaniya sa Balamban Police Station niadtong miaging tuig labot sa iyang gidangatan sa iyang silingan.
Ang suspek giila nga si Dominador Cantiveros, 41-anyos, minyo, gitanggong na karon sa prisohan human siya masikop pinasikad sa Warrant of Arrest nga giisyu ni Judge Hermes Montero, tungod kasong pagpanglugos.
Matud ni PO3 Roland Apas, nga ang suspek gipadad-an kinig subpoena sa miaging tuig apan giingong milayas kini. “Gipatubag mana namo siya, 10 days, ambot kon nitubag ba. Wa siguro ma-convince ang piskalya, mao nalutsan og warrant. ‘Nya atong pagkahitabua, nipahawa na siya ug niadto og Bohol kay iyang iyaan man to among gihatagan ug nakakuha mig info (nga) nibalik, mao tong serve-van gyud namo siya sa maong lugar.” asoy pa sa polis.
Giasoy ni PO2 Rose Ann Portal sa Women’s and Children Protection Desk, nga nahitabo ang maong krimen dihang nag-inum ang biktima uban sa iyang kapuyo u gang suspek. Dihang nawad-an og panimuot ang live-in partner sa biktima tungod sa kahubog, mikalit og sulod ang suspek sa kwarto sa biktima ug didto kini nanglugos.
Nagtingkagol na karon ang suspek sa Balamban Bureau of Jail Management and Penology. (/DILT)(BANATNEWS)