CEBU, Philippines – Usa ka lalaki ang gipadakop human gipasanginlang naghinol sa pribadong parte sa lawas sa usa ka 25 anyos nga babaye diha sa Sitio Tiltil, Barangay Poblacion lungsod sa Samboan.
Naila ang suspek nga si Van Cyrus Canos Opsima, 38, taga Aguilar St. Poblacion, Barili.
Base sa imbestigasyon sa kapulisan nagpaabot og traysikol nga masakyan ang biktima sa dihang gihunongan kini sa suspek nga nagmaneho og Toyota Innova (Red) ug giagni kining pasakyon.
Matud pa nga nituman sab ang dalaga tungod kay miinsister ang suspek nga managkaila sila. Ang biktima misalig sab kay nakamay-ong siya sa dagway ni Opsima.
Apan samtang nagdagan ang sakyanan padung sa Samboan gikatahong kalit nga gihinol sa suspek ang mga pribadong bahin sa lawas sa dalaga.
Matud pang Chief Inspector Warlito Tuñacao, hepe sa Samboan Police Station gidala sa suspek ang dalaga sa usa ka lodging house sa Barangay Dalahikan apan nisukol ang biktima ug naka-text sa kailang polis hinungdan sa pagresponde sa mga otoridad.
Dali untang misibat ang suspek dala gihapon ang babaye apan gigukod kini sa mga polis hangtud nga naapsan sa Sitio Tiltil, Barangay Poblacion sa Samboan ug diha pa sa sulod sa sakyanan ang biktima nga naghilak.
Nasayran nga ang sakyanan sa suspek iya sa uyab niini ug gihimo nila kining ‘rent a car.’ Nasayran nga gikan pa naghatod og pasahero sa Oslob ang suspek ug pabalik na unta sa ilaha dihang naagian niini ang biktima.
Ang suspek natanggong karon sa prisohan ug gipaabot nga pasakaan og kaso sa reklamante. (/IBM)(BANAT NEWS)