CEBU, Philippines – Ang Municipal Trial Court in Cities (MTCC) mipawalay sala kang Konsehal Joel Garganera labot sa criminal case nga gipasaka batok kaniya subay sa giingong pagbalibad niini sa pag-uli sa sakyanan nga giisyu sa Cebu City Government sa gihatag nga deadline.
Si Konsehal Margarita Osmeña kinsa nahimong acting mayor niadtong 2016 mialegar nga si Garganera, kanhi barangay kapitan sa Tinago, milapas sa Article 221 (failure to make delivery of public funds or property) sa Revised Penal Code human napakyas kini pag-deliver sa sakyanan sa dili pa ang Mayo 24, 2016.
Si Osmeña miisyu og memorandum penetsahan og Mayo 20, 2016 nga nagmando nga ang tanang sakyanan nga giisyu sa kagamhanan ngadto sa mga kapitan kinahanglan i-uli sa dili pa ang Mayo 24.
Sa usa ka pahina nga order ni Judge Francisco Seville, Jr. sa Branch 7, mi-dismissed kini sa kaso gumikan sa lack of interest sa habig sa prosecution aron ipadayon ang ilang kaso.
Niadtong November 12, 2018 ang prosecution mihangyo sa korte nga i-reset ang hearing sa Enero 30, 2019 kay ang giingong witness nga si Ronaldo Malacora sa General Services Office dili available.
Si Seville, sa November 12 order niini, mi-grant sa pag-reset sa kaso apan adunay warning sa prosecution nga kon mapakyas gihapon sa pagpresentar sa ebidensiya, sa scheduled date, ang korte mopagawas og desisyon ug hayan ibasura ang kaso.
Ang prosecution atol sa scheduled hearing date Enero 30, pakyas sa pagpatim-aw hinungdan nga subay na sa verbal motion sa abogado ni Garganera, si Seville mi-order sa dismissal sa kaso. Nunot sa maong pagbasura sa kaso, si Garganera mapasalamaton sa maong kalambuan. Si Osmeña wala pa karon sa Sugbo sanglit anaa kini sa America alang sa vacation leave. (/DILT)(BANAT NEWS)