CEBU, Philippines – Ang Department of Health nideklarar og measles outbreak sa rehiyon-7 tungod kay niabot ngadto sa 96 ang kaso sa tipdas o nitaas ngadto sa 2,300 porsyento ug usa ang namatay karong tuiga kompara sa niaging tuig sa samang buwan sa Enero 1 hangtud sa Pebrero 2 diin upat lang ka kaso ang natala ug walay namatay.
Si Dr. Jaime Bernadas, regional director sa DOH-7 nagkanayon nga nag-una ang Probinsiya sa Negros Oriental gisundan sa Probinsiya sa Sugbo, Bohol ug Siquijor ug sugod sa niaging tuig nagkataas ang kaso sa tipdas.
Kasagaran sa naapektohan nagpangedaron og usa ka tuig hangtud 5-anyos.
Sa Dakbayan sa Sugbo adunay 43.8 porsyento nga kaso gisundan sa Dakbayan sa Lapu-Lapu nga adunay 8.3 porsyento, Dakbayan sa Mandaue, 5.2 porsyento, Dakbayan sa Bais, 3.1 porsyento ug sa Liloan nga adunay 3.1 porsyento.
Matud ni Bernadas nga ang bakuna alang measles ang pamaagi aron malikayan sa kabataan nga mataptan sa maong sakit.
Ang semtomas sa tipdas mao ang makasinati og respiratory infection sama sa ubo, sip-on, hilanat unya sulod sa tulo o upat ka adlaw niini manggawas na ang mga rashes sa panit.
Ang DOH nagsugod og outbreak response niadtong buwan sa Septiyembre, 2018 ug nagpadayon gihapon karon ang catch up immunization region wide nga naglakip sa house to house campaign sa local health centers, sa DOH deployed personnel ug sa barangay health workers.
Ang target nga mga bata adunay nagpangedaron gikan sa lima ngadto sa 59 ka bulan tungod kay ang outbreak response sa kabataan nagpangedaron sa 15-anyos paubos. (/BDB)(BANAT NEWS)