CEBU, Philippines — Napirmahan na ni Gobernador Hilario Davide, III ang kontrata tali sa WT Construction alang sa pagtukod sa 20-storey nga resource center sulod diha sa Capitol compound.
Si Davide nibutyag nga niadtong niaging semana iyahang giaprobahan ang notice of award lakip na usab ang notice to proceed alang sa katukoran sa maong edipisyo.
Samtang si Jon Sepe, pangulo sa Provincial General Services Office (PGSO) ug miyembro sa Bids and Awards Committee (BAC) sa Kapitolyo nagkanayon nga ang NOA lang ang ilang gi-serve ngadto sa contractor sanglit ila pa man kining gipasumiter sa performance band sulod sa 10 ka adlaw.
Kon matapos na paglihok sa maong dokumento mamahimo na masugdan sa WT Construction ang pag demolish ug ang pagtukod sa 20 storey resource center.
Samtang si Davide nagkanayon nga aduna nay permit to demolish gikan sa Cebu City hall nga nakuha alang sa pagguba sa karaan nga BAEX building.
Ang WT Construction mao’y nakadaog sa bidding nga gihimo alang sa maong edipisyo ubos sa P1.3 bilyones nga bid niini. Ang Kapitolyo nangutang kini ngadto sa Development Bank of the Philippines (DBP) og P1.5 milyones alang sa katukoran sa maong resource center. (BANAT NEWS)