CEBU, Philippines — Gipahibug-atan sa kampo sa mga Navales nga dili si Vincent Navales ang nakapusil sa duha ka mga sakop sa pamilyang Bacaltos atol sa ilang kagubot niadtong miaging semana diin tulo ang nakalas.
Ang mga abogado sa mga Navales nga silang Attorney Virgilio Ligutan, Jigo Dacua and Ryan Gabuya nagkanayon nga base sa ilang gihuptang ebidensya, si Michael Bacaltos maoy nakaunay pagpusil sa iyang amah nga si Edwin Bacaltos.
Asoy nila nga niadtong Enero 20,nakadawat ang igsuon ni Vincent nga si Vanzant Navales og mensahe gikan kang Shaun Bacaltos, anak ni Edwin, diin gitawag nila ang napatay nga si Vanzant Navales nga usa ka ‘bayot’ pinaagi sa text.
Gikasuko kini ni Vanzant hinungdan nga pagkabuntag sa Enero 21, misulong kini sa balay sa mga Bacaltos didto sa Sambag Uno, Dakbayan sa Sugbo. Ang igsuong si Vincent ug tulo ka mga higala giingong miapas lang kang Vanzant aron nga pugngan kini. Angkon nila nga armado si Vanzant apan giingong si Edwin, kinsang armado og KG-9 maoy miuna og pamusil kang Vanzant.
Sa CCTV footage nga ilang nakalap, si Edwin maoy namusil og una kang Vanzant ug gitiwasan kini ni Michael. Sa pagtiwas ni Michael, giingong naapil og igo ang iyang amahan.
Pasangil sa ilang kampo nga si Michael sab ang nagpusil sa iyang manghud nga si Shaun, kinsang misuway ra og uwang.
“It is unfortunate, but we claim, we can confirm , that it was Michael Bacaltos who shot his father Edwin Bacaltos, Michael Bacaltos picked up the gun nabuhian ni Vanzant, Edwin shot Vanzant, he fell down, paspas nga gipick up ni Micahel na nabuhian ni Vanzant, that’s why Michael nakapabuto og daghan, naigo iya papa and Vicent. Allegation is, mao nakaigo ni Vanzant,” matud pa ni Ligotan
Dugang niini nga andam sila nga dag-on ang maong kaso sanglit masaligon sila nga lig-on ang ilang ebidensya.
Samtang ang abogado sab sa mga Bacaltos nga si Attorney Julius Ceasar Entise miingong nga usa lang ka conspiracy theory ang gisaysay sa kampo sa mga Navales. Gidakop sa kapolisan ang igsuon ni Shaun nga si Michael Vincent Bacaltos human miangkong siya maoy mitiwas og pusil patay kang Vanzant.
Samtang, kasong murder ang atubangon ni Vincent uban sa tulo nila ka mga higala nga kauban niadtong higayona.
Away sa babaye ug away sa negosyo ang mga naunang mga anggulo nga gitutokan sa kapolisan. - /LPM (BANATNEWS)