CEBU, Philippines — Patay ang usa ka lalaki nga nagbantay og peryahan sa Brgy. Ibabao- Estancia, Dakbayan sa Mandaue nga biktima sa pagpamusil sa wala pa hiilhing mamumuno nga nagsakay og motoriklo alas 11 pasado sa miaging gabii.
Si PO3 Angelo Arnaiz sa Presinto 1 sa Mandaue City Police Office miila sa biktima nga si Marlon Malazarte, 44-anyos, nagpuyo sa Purok Kagapi, Barangay Paknaan sa maong dakbayan. Giingong linga kaayo sa iyang pagbantay sa peryahan kinsa nadestino sa pag-atiman sa mga nagdula sa pingpong gambling game dihang usa ka wala hiilhing lalaki ang miduol dayong dul-it sa gidalang hinagiban dayon pusil.
Nahagba sa yuta ang biktima samtang dali nga misibat ang mamumuno kinsa misakay sa nagpaabot nga motorsiklo.
Si PO3 Arnaiz miingon nga wala pa nila matino ang hinungdan sa maong pagpamusil kay ang biktima walay record sa ilang buhatan.
Kasamtangan pang mihimo og lawom nga imbestigasyon ang imbestigador sa naasoy nga presinto aron sa pag-ila sa mamumuno ug ang pagsuta sa motibo niini. (BANAT NEWS)