CEBU, Philippines — Gipakusgan sa kapolisan ilang pwersa alang sa mahitabong Sinulog Grand Parade ugma diin ang Cebu City Police Office mopakatap og mga sakop sa nagkadaiyang dapit sa syudad sa Sugbo.
Ang ‘additional augmentation’ nga gikan sa Regional Mobile Force Battalion (RMFB) ug Cebu Provincial Police Office (CPPO).
Kapin sa 300 ka mga kapolisan gikan sa CCPO ug 255 gikan sa RMFB ang mubantay sa syudad atol sa Sinulog, samtang gipaabot ang laing dugang kapolisan sa Lapu-Lapu, Mandaue, Talisay ug Minglanilla ang motabang.
Gawas sa Sinulog Grand Parade, ang maong mga kapolisan magsugod na sa ilang serbisyo karong adlawa atol sa solemn procession nga moagi sa kadalanan sa syudad.
Si Supt. Marlu Conag, hepe sa kapulisan sa Talisay nagkanayon nga nipadala na sila sa iyang mga sakop sukad pa sa unang nobenaryo sa kapistahan sa balaang bata nga si Sr. Sto. Niño.
Hinuon nagdumili si Conag sa pagbutyag kun pila ka tawo iyang giayuda aron dili mabantayan sa dautang elemento.
Iyang gibutyag nga bisan pa man wala sila maapektuhi kay aduna man sab siyay gibuhat nga security implementation aron dili matandog ang syudad sa Talisay.
Apil sa ilang giayuda ang ilang sakyanan.
Samtang ang lungsod sa Minglanilla pinanguluhan ni Chief Insp. Verniño Noserale nipadala sab og ayuda bisan pa man sa ilang kakuwang sa tawo.
Siya nagkanayon nga hasta ang ilang sakyanan gi-augment sab kini. -Gabriel Bonjoc/LPM (BANATNEWS)