CEBU, Philippines — Nikabat ngadto sa 328 kilos nga karneng baka ang nasakmit sa mga personnel sa Department of Veterinary Medicine and Fisheries diha mismo sa ilang buhatan.
Kini ang gibutyag ni Dr. Alice Utlang, pangulo sa DVMF nga nahinabi sa Banat News.
Matud ni Utlang nga ang maong mga karne walay branding ug ang meat inspection certificate tampered hinungdan nga ilaha kining gisakmit ug ipakaon sa mga iro.
Gibana-banang mokabat tanan ngadto sa P125 mil ang kantidad sa maong mga karne nga nasakmit.
Gibutyag ni Utlang nga ang maong mga karne sa baka gidala diha sa ilang buhatan alang sa re-inspection ug sa pagsusi nila niini wala kini marka ug ang papeles gi-tampered.
Giingong adunay usa ka original certificate nga gipaihaw gikan sa Dakbayan sa Talisay ang maong mga karne samtang ang uban sa balay lang.
Ang maong mga karne gi-re-inspect tungod kay dili kini madawat sa mga supermarket kong dili moagi sa buhatan sa DVMF hinungdan nga gisakmit kini gikan sa tag-iya.
Dugang ni Utlang nga sa nilabay’ng adlaw aduna silay duha ka baboy nga gi-condemned tungod kay ilang gidudahan nga aduna kini hog cholera ug manakod kini sa isig ka baboy. BDB (BANATNEWS)