CEBU, Philippines — Gidagsa sa mga gustong mamaligya sa umaabot nga Sinulog Festival ang unang adlaw sa rehistrasyon nga gihimo sa Division for the Welfare of the Urban Poor (DWUP) nga gipahigayon sa Cebu City Hall.
Matud sa operations head sa DWUP Genevieve Alcoseba nga kapin sa 500 ka mga tawo ang miadto sa ilang unang adlaw sa registration ug ilang gisultihan nga pahibaw-on ang ilang mga kaubanan nga magpadayon sila sa adlawng Lunes hangtod na sa Sabado, petsa 12 nga maoy katapusang adlaw sa ilang registration. Dugang niini nga ang mga makarehistro adunay special permit aron makatinda sa Biyernes, Sabado ug Domingo nga mao na gyud ang Sinulog Grand Parade.
“Ang kaning permit nga ilang gilukat karon mao ni ang mahimo nilang gunitanan nga i-allowed sila sa pagpaninda during the Sinulog celebration so that would be three days”, asoy ni Alcoseba. Usa ka semana sa dili pa ang Sinulog Festival ipagawas sa DWUP ang ilang mga permit uban sa ilang I.D. ug mobayad sila sa City Treasurer’s Office alang sa ilang Official Receipt usa mahatag ang mga permits.
Ang bayran sa mga nagparehistro depende sa unsay ilang ibaligya, apan gitataw ni Alcoseba nga kun pagkaon ang ibaligya, ang manindahay kinahanglan adunay health card.
Modawat og registration ang DWUP sa mga nagpuyo sa laing lugar sama sa Bohol ug Mindanao sa adlawng Biyernes, special registration nila nga gustong maninda panahon sa Sinulog. Samtang kadtong mga residente sa siyudad, usa ka semana ra gyud ang ilang gihatag. Pahinumdom ni Alcoseba sa mga nagparehistro nga inig kuha sa permit siguraduon gyud nga basahon ang guidelines aron masayod sa unsay gidili ug unsay mga gitugot.
“For example, kanang mga botelya sa softdrinks dili na allowed during the Sinulog kay maka-obstruct na simbako naay stampede maka-disgrasya na og mga dumuduong nato, even atong passersby. So bawal ang mga folding bed, they are only allowed to use screens kanang maninda og mga unsa-unsa,” ni Alcoseba pa.
Gipahibawo sab niini nga daghan sila nga mag-monitor sa mga manindahay kon nisunod ba o wala sa gihatag nga guidelines. (/DILT)(BANATNEWS)