CEBU, Philippines — Duha ka mga langyaw ang gidakop sa kapolisan tungod sa managlahing insidente sa pagpabadlong nga ilang gihimo.
Didto sa Perrelos, sa Dakbayan sa Carcar gireklamo sa usa ka drayber sa bus nga si Hilaro Manzanades Ordaniza, 53, ang French national nga si Frederec Andre Villeneuve, 48, taga Toulouse, France.
Ang maong langyaw pasahero sa bus ni Ordaniza. Matud pa sa kapolisan gipatiran sa suspek ang bintana sa bus hinungdan sa pagkabuak niini.
Matud pa ni Police Superintendent Gregorio Galsim, hepe sa kapolisan sa maong dakbayan giinitan sa bus si Villenueve mao nga gipatiran niini ang bintana aron makasulod ang hangin.
Si Ordaniza daling mimaneho sa iyang bus padung sa police station ug gireklamo didto ang iyang pasahero hinungdan sa pagdakop niini.Ang langyaw pasakaan og kasong malicious mischief.
Laing langyaw usab ang giaresto mao ang Amerikanong si Michael Philpott, 39, taga Ohio, USA tungod sa pagpangulata sa silingang magtiayong Annaliza Lagulay Ariosa ug si Jose Froilan Napoles Ariosa.
Ang suspek ug ang mga reklamante parehong nagpuyo sa usa ka condominium ug giingong “business partners” apan niaslom ang ilang relasyon hinungdan sa panag-away.
Base sa imbestigasyon, giingong nanuktok ang suspek sa balay sa magtiayon ug pag-abli sa babayeng Ariosa kalit kining gibunalbunalan sa gibitbit ni Philpott nga kalaha.
Daling mitabang ang bana niini apan giapil kini sa pagpuspos sa maong kalaha hinungdan sa grabeng bun-og nga naangkon ug gidala sa tambalanan.
Tungod sa gidak-on sa maong langyaw wala makaporma ang gwardiya ug mitawag nalang sila og polis. Ang suspek gitanggong karon sa Abellana Police Station alang sa kasong ipasaka. "Dako man gyud ning tawhana, mao naglisud ang sikyu sa pagdakop niya.
Matod sad sa complaint nga babaye (asawa) nga business partners ni sila sa suspetsado mao naa silay gilalisan dayun maayo niabot ang anak sa managtiayon kuyog ang ilang driver mao to naulang sila.
Wala man pud mihisgot ug rason ang Amerkano (kun nganong iyang gikulata ang duha)," matud ni Chief Inspector Edward Sanchez, hepe sa maong presinto. (/IBM)(BANATNEWS)