CEBU, Philippines – Moabot ngadto sa kapin usa ka bilyon ang net surplus sa Probinsiya sa Sugbo sulod lang sa onse ka bulan sa tuig 2018.
Sa record sa Provincial Accounting Office, moabot sa kapin P1.1 bilyones ang net surplus sa Kapitolyo gikan sa bulan sa Enero hangtod Nobyimbre sa miaging tuig. Wala pay labot niini ang bulan sa Disyembre.
Ang Kapitolyo adunay kapin P3.9 bilyones nga gross income sulod sa onse ka bulan. Samtang moabot usab og kapin P2.8 bilyones ang nagasto gikan sa Enero 1 hangtod Nobyimbre 30, 2018.
Ang kinatibuk-an nga kita sa gobyerno kuhaan sa nagasto niini mao ang gitawag nga net surplus.
Matud ni Ramon Dumayac ang provincial accountant nga ang net surplus, adto kini mapunta sa equity account sa probinsiya.
Sa nagasto sa Kapitolyo matud ni Dumayac nga kasagaran niini nakuha gikan sa annual budget ug supplemental budget lakip na ang personal services, social services sa mga empleyado ug ang maintenance ug uban pang gastuhan.
Padayon pa usab nila nga giproseso ang ilang nagasto hangtud Disyembre 2018.
Gikatakda nga sila makasumiter sa record sa dili pa o sa petsa 14 sa bulan sa Pebrero subay sa kamanduan sa Commission on Audit. (BANAT NEWS)