CEBU, Philippines – Nakasinati ang tibuok Central Visayas og pag-ulan kagahapong adlawa gumikan sa amihan matud pa sa Philippine Atmospheric, Geophysical and Astronomical Ser-vices Administration (PAGASA).
Si Jhomer Eclarino, weather specialist sa PAGASA Mactan nagkanayon nga ang pag-ulan gumikan sa weather system nga amihan nga maoy hinungdan kon nganong nakasinati og pag-ulan dili lang sa Sugbo apan lakip na ang tibuok Kabisay-an.
Dugang ni Eclarino nga hinay ngadto sa kasarangan nga pag-ulan ang nasinati sa Cebu, samtang panagsa nga kusog nga pag-uwan ang nasinati sa Eastern Visayas hangtud kaganihang kaadlawon.
Si Eclarino midugang nga karong adlawa, makasinati ang Sugbo og maayong panahon ug magpadayon kini sulod sa lima ka adlaw.
Hinuon walay giisa nga gale warning sa Central Visayas apan giawhag ni Eclarino nga dili lang una magpalawod ang mga gagmayng sakayan ilabi na kadtong mangisda kay makasinati og kasarangan ngadto sa pagkabaluron nga kadagatan ug delikado kini. Sa gipagawas nga abiso sa PAGASA kagahapon sa alas 5:12 sa hapon, basi sa Mactan radar, nakaapekto ang tail end of a cold front nga naglakip sa Habagatang Sugbo sa red warning level o adunay mga pagbaha sa ubos nga mga dapit ingon man hulga sa pagdahili sa yuta sa bukirang mga dapit. (/DILT)(BANAT NEWS)