CEBU, Philippines — Padayunon gihapon sa kasamtangang administrasyon ang pagpalambo sa Siyudad sa Sugbo pinaagi sa pag-implementar og mga bag-ong programa karong Bag-ong Tuig.
Giangkon ni Cebu City Mayor Tomas Osmeña nga wala gihapon masulbad ang krimen, ilegal nga drugas, ug kakabus sa mga miaging tuig.
“As long as there are improvements, I believe life would be better,” gibutyag niya.
Karong tuig 2019, gipanghambog sa mayor ang bag-ong programa nga maghatag og libreng sakay alang sa mga estudyante gikan sa bukirang bahin sa dakbayan. Ubos sa naaprubahan nga P8.1 billion Annual Budget for 2019, migahin ang siyudad og P6.6 million nga sweldo alang sa mga drayber sa mga buses, P26.4 million alang sa gasoline ug lana, P20 million alang sa renovation sa Cebu City condominium, P10 million alang sa operasyon sa condominium, ug P11.2 million alang sa meal allowance sa mga estudyante nga nagpuyo sa bukirang barangay.
Laing P232 million ang gigahin sa pagpalit og 40 ka mga buses alang sa maong bag-ong project.
“College students who live in remote barangays have a significantly harder time going to and from school. Jeepneys routes are sparse, and habalhabals are very expensive. There is also the matter of peace and order as well as simply having the time to commute, study, and for some, work,” sigon sa mayor.
Gani, matud niya nga daghang masulbad nga problema tungod niining bag-ong programa. Lakip niini ang problema sa transportasyon sa kabataan, mga gubang karsada sa bukid, mahal nga pletehan sa habalhabal ug uban pa.
Daghang mga infrastructure projects ang nasugdan sa miaging tuig diin lakip niini ang 8.5 kilometer nga taytayan nga magkonektar sa Mactan Island ug Cebu ug ang P18 billion integrated resorts and casino sa Kawit Island sa South Road Properties.
Lakip sa plano sa mayor ang paghimo og Call Center City sa SRP diin tanang opisina alang sa trabaho, eskuyla, mall, gym, restaurant, ug uban pa ang anaa na sa usa ka lugar. Gibutyag ni Osmeña nga daghang mga makabenepisyo sa maong proyektot nga giingong sugdan human sa eleksiyon. (/DILT)(BANATNEWS)