CEBU, Philippines — Girelibohan sa iyang pwesto isip kura paruko sa Nativity of Mary Parish sa Canduman, Mandaue City si Fr. Decoroso Olmilla samtang gipahigayon pa ang imbestigasyon may labot sa pasangil nga pagpanagmal niini og bata.
Ang maong pari nagtingkagol sa prisohan human siya gireklamo sa anak sa iyahang kusinera.
Matud pa ni Archbishop Jose Palma, sa Archdiocese of Cebu, aduna na siyay tulo ka mga pari nga mohimo og imbestigasyon kalabot sa maong kaso.
Sila si Msgr. Raul Go, Msgr. Danny Sanico ug Fr. Sherwin Leo Ferrater mohimo ug imbestigasyon batok sa gireklamo nga pari.
Sumala pa ni Palma, iyang gipaniguro sa publiko nga aduna gayuy hustisya nga makab-ot tungod kay unsay rekomendasyon ug resulta sa imbestigasyon maoy sundon gayud ang naa sa balaod. Dugang pa ni Palma, iya usa gikuha sa parokya si Olmilla diin dili kini makahimo sa iyang responsibilidad, samtang aduna pay imbestigasyon nga himuon.
Matud ni Palma dili makaayo ang presensya niini diha sa iyang parokya tungod sa maong hitabo. Si Olmilla pulihan ni vicar general Msgr. Sanico nga maoy modumala sa parokya sa maong pari ug abagan kini og assistant parish priest.
Gitug-an ni Palma ang tulo ka mohimo sa imbestigasyon maoy gitahasan kanunay sa artsidiyosisis matag dunay mga kontrobersiya nga gikalambigitan sa ilang mga pari.
Ang Arsobispo nasubo ug nangayo ug pasaylo sa publiko ilabi na kadtong nasakitan, nakurat ug na eskandalo sa maong panghitabo. Gipasalig niya nga mopatigbabaw gyud ang balaod ug hustisya para sa tanan aning kasoha.
Malaumon ang arsobispo sulod sa usa ka semana makaduso na ug report ang investigating team.
Si Olmilla gireklamo sa 15 anyos nga dalagita nga anak sa kusinera niini kay gibunalan sa maong pari og karton ang bata gumikan kay wala niini naatiman ang mga binuhing iro sa maong pari. (/IBM)(BANATNEWS)