CEBU, Philippines — Tulo ka mga South Korean nationals ang nadakpan pinasikad sa search warrant tungod sa giingong pag-operate og illegal online gambling sulod sa usa ka condominium sa Barangay Apas, Cebu City miaging Sabado sa hapon.
Ang mga suspetsado nailhan nga sila si Hyeonhee Na, 25, usa ka babaye; Sanggwi Ji, 21, ug si Taejin Maeng, 21, pulos taga South Korea.
Gironda ang ilang panimalay human sa duha ka bulan nga surveillance operation dihang adunay nakatug-an kanila bahin sa sugal sa online nga gipadagan sa tulo.
Ang mga operatiba sa Regional Special Operations Group nga gipangulohan ni Senior Inspector Windell Abellana mironda sa panimalay sa tulo pinasikad sa search warrant tungod sa paglapas sa Republic Act 9287 or an act increasing the penalties for illegal numbers games and the Republic Act 10175, or the Cybercrime law. Nakuha gikan sa tulo ang computer ug uban pang ebidensya nga atoa karon sa PNP Anti-Cybercrime Group alang sa himuong forensic examination pagtino sa ilang operasyon online. Nabalhog karon sa Abellana Police Station ang tulo ug sigon pa sa kapulisan wala pa’y nibista ani nga lawyer.
Abellana miingon pud nga coordinated ang operasyon sa Foreign National Liaison (Korean desk) nga giuluhan ni Senior Inspector Irvin Belen and Criminal Investigation and Detection Group in Central Visayas, Chief Inspector Hector Amancia.
Si Abellana mingon nga padayun ang ilang follow-up investigation aron masusi kung aduna ba kalambigitan ang tulo sa mga South Koreans nga nadakpan niadtong sa Septiyembre miaging tuig sa usa ka balay sulod sa Maria Luisa Village, sa Barangay Banilad. (BANAT NEWS)