CEBU, Philippines — Ang kagamhanan sa Probinsiya sa Sugbo mopahuwam og luna ngadto sa Land Transportation Office (LTO)-7 aron himuong temporaryong impounding area. Si Gobernador Hilario Davide, III sa habig sa probinsya ug LTO Regional Director Victor Caindec nagpinirmahanay kini sa memorandum of agreement (MOA) alang sa pagpahulam sa Kapitolyo sa 2,500 square meters nga luna nga nahimutang diha sa Barangay Apas, Dakbayan sa Sugbo.
“The second party (LTO) is in need of an impounding area for motor vehicles apprehended by it in the performance of its mandate and has requested the first party (Probinsiya sa Sugbo) for a space therefor for a period of six months until the second party shall have found a permanent impounding area” tipik sa MOA. Sa maong MOA ang LTO mao ang mobayad sa kuryente ug tubig nga magamit sa mga personnel nga idestino sa lugar lakip na ang maintenance.
Ang LTO usab ang mobutang og kaugalingon niini nga security guard nga mobantay sa tibuok impounding area.
Gawas niini, ang LTO usab maoy mobutang sa perimeter fence sa maong dapit ug maoy mopabutang og suga.
Sayo pa gipadayag ni Caindec nga nanginahanglan sila og luna nga kabutangan sa mga ma-impound nga mga sakyananan sa LTO ug nagpasalamat kini nga nipahulam ang probinsiya sa usa sa mga properties niini. (/BDB)(BANATNEWS)