CEBU, Philippines — Nunot sa nagsingabot nga Misa de Gallo nga magsugod karong Disyembre 16, nangandam na ang kagamhanan sa Siyudad sa Sugbo aron masiguro ang kaluwasan sa mga manimbahay ug magpabilin ang kahapsay ug kalinaw sa dakbayan.
Gilauman nga sa unang adlaw sa Misa de Gallo, mosugwak ang bagang duot sa katawhan sa mga simbahan. Subay niini, si Konsehal Dave Tumulak, tsirman sa Committee on Public Order and Safety miingon nga nakig-alayon na sila sa kabarangayan ug mga traffic enforcers alang sa maong kalihukan.
Dugang sa konsehal nga gawas sa mga simbahan kinahangaln sab nga bantayan sa mga tanod ang mga barangay ilabi na ang mga sudlunon nga bahin kay gikabalak-an nga basin og mosiaw ang mga kawatan mao nga hangyo niya sa katawhan nga dili mo kumpiyansa.
“Magmatngon lang gyud sila unya ang panimalay gyud siguraduhon gyud nga luwas. Lock. Ingon man naay magbantay”, pasidaan ni Tumulak.
Samtang gihulagway sab sa operations chief sa Cebu City Transportation Office (CCTO) nga si Francisco Ouano nga andam na sab sila sa unang adlaw sa Misa de Gallo diin aduna sila’y ipang-deploy nga mga traffic enforcers sa nagkalain-laing simbahan.
Hangyo niya sa publiko nga itarong lang og park ang mga sakyanan aron dili makaali sa laing mga sakyanan atol unya sa naasoy nga kalihukan. (/DILT)(BANATNEWS)