CEBU, Philippines — Patay ang kanhi binilanggo sa Mandaue City Jail nga kalit lang gipusil sa riding-in-tandem duol sa barangay hall sa Jagobiao, Dakbayan sa Mandaue alas 3 pasado ang takna sa miaging hapon nga nakaingon sa panaghuot sa mga sakyanan paingon sa norte nga bahin sa lalawigan sa Sugbo.
Si Chief Inspector Rogene Fudotan, hepe sa Presinto 3 sa Mandaue City Police Office (MCPO) miila sa biktima nga mao si Romeo Mejias, 32 anyos nga taga Sitio Sto. Rosario, Barangay Jagobiao.
Matud pa ni Police Officer 1 Glenn Nordalba, imbestigador sa Presinto 3 sa MCPO nga gikan sa lungsod sa Consolacion ang biktima nga nagsakay sa iyang motorsiklo.
Sa iyang pagliko paingon pasulod sa Eversely Child Sanitarium General Hospital sa Barangay Jagobiao kalit mibutho ang motorsiklo nga giluwanan sa duha ka tawo.
Gipusil sa backrider ang biktima hinungdan sa pagkalamba niini sa karsada. Human niini, ang backrider nikanaog sa motor ug gitiwasan kini ug nisibat.
Gidala sa mga tawo ang biktima diha sa kasikbit nga tambalanan apan patay na kini.
Matud pa ni Bordalba nga si Mejias usa ka drug personality sa ilang dapit ug niadtong bulan lamang sa Septiyembre niining tuiga nga nakagawas.
Samtang patay sab ang usa ka habal-habal drayber nga gidudahang asset diha sa Camella Homes, Barangay Lawaan 1, Dakbayan sa Talisay niadtong Miyerkules sa alas 11:12 sa gabii.
Ang biktima nailhan nga si Michael Bañez, 38, lumad nga taga Cananga, probinsya sa Leyte.
Si Chief Insp. Ardelito Cabagnot, deputy chief sa Talisay City Police Station nibutyag nga nagmotor ang biktima ug kalit gipusil sa mga lalaking nagmotor nga nagsunod kaniya.
Bisan nasamdan na nakapadayon og maneho ang biktima sa unahan apan didto nahagba ug nakabsan sa iyang kinabuhi. Matud ni Cabagnot may nakadungog nga ang usa sa mga mamumuno miingon “dili nalang ta ana bai” dayon sunod-sunod nga buto na ang ilang nadunggan.
Nagduda si Cabagnot nga posibleng kaila sa biktima ang mga mamumuno. Gisusi usab nila ang impormasyon nga police asset ang biktima.
Didto sa Dakbayan sa Toledo, usa ka wala mailhing lalaki ang napalgan sa Purok 7, Barangay Bunga kagahapon sa buntag nga adunay mga samad pinusilan sa kalawasan.
Ang biktima gibanabanang 5’2 ang height, ug nagsul-ob og kolor yellow nga sleeveless, itom nga short pants ug itom nga tsinelas. Adunay tattoo sa iyang wala nga bukton nga ‘Samantha’, samtang adunay tattoo sa iyang tuo nga bukton nga porma og bata.
Sa impormasyong nahipos sa kapulisan gikan nianang gabii sa Disyembre 5, 2018 pasado alas 11:00 sa gabii usa ka kolor abuhon nga awto ang nihunong sa maong dapit ug paspas usab nga mibiya padung sa direksyon sa Barangay Lamac sa Lungsod sa Pinamungajan.
Padayon pa ang imbestigasyon sa kapulisan sa Toledo sa pag-ila sa biktima ug sa mga mamumuno niini. - IBM (BANAT NEWS)