CEBU, Philippines – Lugar diin naligid ang dakong bato ug nisira sa dalan sa may Sitio Catap, Barangay Banlot, Lungsod sa Sibonga usa lang ka kilometro gikan sa Fault Line sa maong lungsod ug ang mismong lugar naapil sa listahan sa mga dapit nga peligro sa landslides kon mouwan sumala pa sa usa ka opisyal sa maong lungsod.
Si Damiano Ofqueria Jr., Municipal Disaster Risk Reduction Officer sa Sibonga mibutyag sa Banat News nga ang QM Builders nipadala na sa ilang backhoe ug breaker sa area aron kuhaon ang maong bato.
Hangtud ning pagsuwat sa balita, dili pa gihapon maagian ang dalan tungod niini hinungdan nga gipabantayan og mga tanod aron walay mangahas paglabang tungod sa kapeligro nga basin aduna pa mangatagak nga bato.
Sumala pa ni Ofqueria, ang sitio Catap, Barangay Banlot usa sa mga lugar nga nalakip sa 13 ka mga barangay nga posibleng may mahitabong landslides tungod sa pagbunok sa uwan base sa listahang gipagawas sa Mines and Geosciences Bureau-7.
Gitug-an ni Ofquerio, sa wala pa ang Bagyong Samuel, nagsige na og ulan-ulan sa lugar ug kini maoy gituohan nilang hinungdan pagkaligid sa maong dakong bato. Swerte hinuon nga way naigo nga lumalabay sa maong dalan.
Plano karon nga gawas sa maong bato, panangtangon usab kadtong naa sa ibabaw aron di na kini matagak pa sa ubos. Giawhag ni Ofquerio ang mga residente sa lugar nga adto lang una sa alternatibong mga agianan sa Cangmanila padulong sa Banlot Proper ug Banlot Proper padulong sa Barangay Mangyaw ug Barangay Lamacan lahos na ngadto sa national road sa lungsod. (/IBM)(BANAT NEWS)