CEBU, Philippines – Andam si Cebu City Mayor Tomas Osmeña nga mo-accommodate og private firm kinsa motanyag og bus ride alang sa mga trabahante sa Business Processing Outsourcing (BPO).
Matud ni Osmeña nga bukas siya nga tugotan ang private companies nga motanyag og bus ride sa ubos nga pletehan.
Giingong adunay private firm ang nipadayag nga buot mobiyahe diha sa IT Park sa Barangay Apas. Gihatagan og pagtagad ang seguridad sa BPO workers human sa nahitabong insidente nga naglambigit sa call center agent nga si Loraine Temple, 37-anyos kinsa gipusil patay human kini gitulis diha sa Barangay Mabolo.
Sa kasamtangan, obserbahan sa kagamhanan sa siyudad ang sitwasyon nga nagtanyag og free bus ride sa BPO workers ug mohimo og mga adjustment sa umaabot alang sa pagpalambo sa serbisyo.
Gipasabot ni Osmeña nga ang siyudad nagtanyag og libre nga sakay sanglit kon magpabayad sila kinahanglan nila nga mokuha og prangkisa sa Land Transportation Franchising and Regulatory Board (LTFRB) ug kinahanglan kini og taas nga panahon.
Kahinumduman nga sukad niadtong Nobiyembre 12, 2018 upat ka bus ang gi-deploy aron mopasakay sa call center agents gikan sa IT Park diin sagad sa mga BPO companies nahimutang diha sa maong lugar.
Nunot niini, si Nanette Garong, call center program head nagkanayon nga 50-seater bus mopasakay sa mga trabahante gikan sa Juan Luna Avenue corner M.J Cuenco paingon sa IT Park ug vice versa diin available kini gikan sa alas 8:15 sa gabii hangtod sa alas 4:30 sa kadlawon.
Gumikan sa demand sugod sa adlaw'ng Lunes laing bus ang available alang sa call center agents gikan sa F. Cabahug Street sa Barangay Mabolo hangtod sa Barangay Talamban.
Ang maong bus available sa alas 8:15 sa gabii hangtod sa alas 4:30 sa kadlawon. (/BDB)(BANAT NEWS)