CEBU, Philippines — Ang kagamhanan sa Probinsiya sa Sugbo niapod-apod sa 23 ka patrol cars gahapon sa buntag ngadto sa nagkadaiyang police stations ug sa police provincial headquarter.
Ang maong mga sakyanan nagkantidad kini tanan ngadto sa P23.897 milyones nga gikuha gikan sa pundo sa peace and order sa probinsiya.
Ang gihatagan mao ang police stations sa mga lungsod sa Catmon, Alcantara, Dumanjug, Ronda, Badian, Moalboal, Alegria, Ginatilan, Sogod, Medellin, Oslob, Samboan, Tuburan, Santander San Remigio, Minglanilla, San Franscisco, Compostela, Daanbantayan ug Argao.
Lakip usab nga gihatagan ang Cebu Provincial Police Office (CPPO).
Si Gobernador Hilario Davide, III nagkanayon nga ang maong mga sakyanan suporta kini sa Probinsiya sa Sugbo ngadto sa kapolisan.
Si Senior Superintendent Manuel Abrugena nagkanayon nga dako ang matabang sa maong mga sakyanan sa ilang operasyon hilabina sa pagpatrolya.
Samtang ang mga mayor ug bise mayor sa maong mga lungsod nga nahatagan nitambong usab sa kalihokan kagahapon.
Si Davide niawhag usab nga sa mga hepe nga kanunay nga makig-alayon sa mga mayor sa ilang mga lungsod ug dakbayan.
“I ask police chiefs to always consult to the mayors. You cooperate. It would be very good if you have good working relationship”, matud ni Davide.
Ang Kapitolyo nakahatag na kini og 346 ka service vehicles ngadto sa nagkadaiyang LGUs sa tibuok Probinsiya sa Sugbo.
Dugang ni Davide nga sa sunod tuig laing hugna sa mga patrol cars ang ilang ipanghatag ngadto sa mga police station nga wala pa makadawat. (BANAT NEWS)