CEBU, Philippines — Usa ka 63- anyos nga maguuma ang napalgang patay nga adunay mga samad pinusilan diha sa iyang umahan sa Sitio Arpili, Barangay General Climaco, Dakbayan sa Toledo niadtong Sabado sa gabii. Panagilog sa yuta ang gidudahan.
Ang gipatay giila sa kapolisan nga si Meliton Dayday, residente sa maong dapit. Sigun pa ni Police Officer 3 Bombino Enriquez, sa Toledo Police Station adunay nadungog nga sagunsong sipang boto sa armas ang asawa sa biktima.
Sa pagsusi sa ginang nakit-an niini ang bana nga nagbuy-od na sa ilang gibaol nga yuta ug aduna kining daghang mga samad pinusilan nga nakaingon sa hinanali niining kamatayon.
Away sa yuta ang gidudahan sa kapolisan nga motibo sa krimen sanglit nigawas sa ilang imbestigasyon nga nagilogay sa maong umahan ang biktima ug ang igagaw niini.
“Kanang yutaa, sa Carmen Copper gyud na siya unya nagiyahay lang na sila og ugmad. Ang maong pwesto nga giugmad sa biktima giangkon pud sa person of interest,” matud pa sa maong polis kinsa nagdumili sa pagbutyag sa pangalan sa maong tawo.
Giingong gisuwayan sa kapolisan og imbitar sa ilang estasyonan ang igagaw sa biktima apan wala na kini magpakita. “Dili pa gyud siya suspect. Person of Interest pa,” pagklaro pa sa maong polis. (BANAT NEWS)