CEBU, Philippines – Gilauman nga mokunhod ang gidaghanon sa mga pasyente nga modangop diha sa mga dagkong hospital tungod sa plano sa nasudnong kagamhanan sa pagpalambo sa serbisyo ug pasilidad sa mga primary health care sa nasud.
Kini ang gibutyag ni Department of Health Secretary Francisco Duque atol sa iyang pagbisita sa Sugbo niadtong nilabay’ng Huwebes.
Matud ni Duque nga lakip ang maong plano sa ilang Fourmula One Plus For Health Strategy ubos sa Universal Health Care coverage.
Si Duque nianhi sa Sugbo aron personal nga mopaambit sa plano sa ahensiya ug nitug-an sa mga tigbalita nga buot nila nga mapalambo ang performance sa primary health care facilities ilabi na sa mga barangay.
Ang DOH nagplano usab kini nga magbutang og usa ka health station matag barangay nga maka-cover sa 5,000 nga populasyon.
Gawas niini, buot usab nila nga adunay usa ka rural health unit sa matag barangay nga makaatiman sa 10,000 ka populasyon.
Ang pagpalambo sa mga health care services sa nasud usa lamang sa lima ka pillars sa Fourmula One Plus One For Health Strategy nga ipadayon sa DOH sa pag-implementar unya sa Universal Health Care Bill.
Ang laing upat ka pillar naglakip sa financing, regulation, governance ug performance accountability.
Malaumon ang kadagkuan sa DOH nga mapirmahan ang maong balaodnon sa dili pa matapos ang tuig 2018. (/BDB)(BANAT NEWS)