CEBU, Philippines – Gihimakak ni Mandaue City Mayor Gabriel Luis “Luigi” Quisumbing ang giingong wala niya pagtuman sa kasabutan tali nilang Kongresista Jonas Cortes ang nakaingon sa pagkasiak sa ilang panag-alyado.
Gipasabot ni Quisumbing nga ang pagtangtang sa trabaho sa mga casual ug job order nga kawani adunay basehanan tungod kay nakahimo kini og mga kalapasan.
Matud ni Cortes nga sukad siya nahimong mayor sa dakbayan, wala siya’y gitangtang nga mga kawani sa City Hall tungod sa kalooy sukwahi sa kasamtangan nga administrasyon nga liboan ang nakulban sa kaldero.
Apan alang kang Quisumbing nagsugod ang dili maayo nilang pagsinabtanay dihang gipugngan ni Cortes ang pagsumiter sa mga dokumento nga gipangayo sa Ombudsman labot sa kasong plunder nga gipasaka batok sa kongresista.
Sumala pa ni Quisumbing nga dili angay mabalaka si Cortes kung kini nagtuo nga walay anomaliya ang pagbaligya sa luna sa Barangay Looc sa tag P50 ang matag metro kwadrado. (/GMR)(BANAT NEWS)