CEBU, Philippines – Gi-review karon sa Bids and Awards Committee sa Cebu City Hall ang bidding documents sa Geo Transport and Construction Inc., alang sa rental sa heavy equipment nga nagkantidad og P12 milyones karong buwana.
Ang maong kantidad naglangkub alang sa 11 ka dump trucks ug 10 ka compactor trucks nga mokolekta sa basura sa kabarangayan sulod sa 24-oras. Kagahapon ang pangulo sa BAC, Ronaldo Malacora, niingon nga ang Technical Working Group nagpahigayon na og post-qualification sa Geo Transport nga maoy nag-inusarang bidder alang sa rental contract.
Malaumon si Malacora nga ang TWG makahatag og resulta sa post-qualification aron ilang mahibaw-an kun ang Geo Transport maoy winning bidder. Ang Geo Transport dunay rental contract sa kagamhanan sa siyudad gikan sa buwan sa Hulyo ngadto na sa Agosto nga nagkantidad og P21.1 milyones. (/GMR)(BANAT NEWS)