CEBU, Philippines — Ipahigayon karong buntag ang tinuig nga Walk With Mary subay usab sa pagsaulog sa adlaw nga natawhan sa Mahal nga Birhen Maria.
Alas 3:30 sa kadlawon ang assembly sa Fuente Osmeña Rotunda una pa ang prosesyon sa alas 4 sa kadlawon padulong sa Cebu Metropolitan Cathedral ug isunod ang Santos nga Misa sa alas 6 sa buntag.
Ang Santos nga Misa dumalahon ni Archbishop Jose Palma.
Ang tinuig nga Walk With Mary gipasiugdahan sa Archdiocese of Cebu ug Children of Mary diin inubanan kini sa imahe ni Maria sa nagkalain-laing titulo.
Naatol kini sa adlaw nga natawhan sa Mahal nga Inahan ang Birhen Maria ug sumad usab kini sa ika-150 ka tuig nga presensya sa asosasyon sa Children of Mary sa Pilipinas.
Gidapit ang tanan mga magtutuo sa pag-apil ug magdala og rosaryuhan, kandila, payong ug transistor radio aron makapaminaw sa isibya nga pag-ampo sa DyRF 1215 AM radio station.
Giawhag ang tanan nga mag-ambahan sa pagsaulog sa adlaw nga natawhan sa Mahal nga Inahan. (/GMR)(BANATNEWS)