CEBU, Philippines — Kasong murder ug theft ang gisusi karon sa kapolisan sa Dakbayan sa Lapu-Lapu human gipusil patay ug gikawatan pa sa iyang mga alahas ang usa ka contractor niadtong Sabado sa hapon sa Sitio Bliss, Pajac sa dakbayan.
Gilantaw karon sa kapolisan kung aduna bay grupo sa mga kawatan sa dakbayan nga ang modus mao ang pagpusil patay sa mga biktima una kawatan.
Usa ka Arsenio Ycong, 52, ig-agaw ni Lapu-Lapu City Vice Mayor Marcial Ycong ug contractor sa Philippine Export Zone Authority ang gipusil sa ulo sa tulo ka lalaking nagmotor.
Ang biktima gikan nagpalit og pagkaon alang sa panihapon luwan sa iyang sakyanan dihang gipusil ug sa dihang nahagba, gikuha sa mga mamumuno ang iyang kwentas ug bracelet.
Gisusi karon sa kapolisan ang motibo ug ang background sa biktima kung aduna ba kini hulga nga nadawat sumala pa ni Police Supt. Eloveo Marquez, hepe sa Investigation and Detective Management Bureau-Lapu-Lapu City Police (IDMB-LLCPO).
Lakip sa susihon kung aduna ba kini kalambigitan sa murder ug theft case ni Senior Police Officer 2 Wilfredo Amores. (BANAT NEWS)