CEBU, Philippines — Nangayo og temporary restraining order ug writ of preliminary injunction ang negosyanteng si Peter Go Lim sa Korte Suprema human sila nalutsi og warrant of arrest sa kaso sa giingong kalambigitan sa ginadiling drugas.
Ang petition for certiorari gisang-at ni Lim batok sa Department of Justice nga gipangulohan ni Secretary Menardo Guevarra, ug ang panel of prosecutors nga gilangkuban nilang Senior Assistant State Prosecutors Juan Pedro Navera ug Anna Noreen Devanadera, ug Prosecution Attorney Herbert Alvin Cabugan.
Ang petisyon gisang-at sa mga abogado sa Loja-Lopez Law Firm sa Makati City ug gidawat sa Korte Suprema isip G.R. No. 239228
Gipataban sa petisyon ang unang DOJ Resolution nga gipirmahan ni kanhi Justice Secretary Vitaliano Aguirre II nga nagbasura sa kaso nilang Lim ug drug distributor nga si Kerwin Espinosa, ug ang Transcript of Stenographic Notes sa hearing sa Senate Committee on Justice and Human Rights.
Ang DOJ sa sayo pa niingon nga subay sa Section 28, Rule 130 sa Rules of Court, ang pag-angkon iya lang sa nangangkon apan maisip nga tinumo-tumo kung dunay laing tawo nga ilambigit.
Sa pasangil sa sinumbong nga si Marcelo Adorco nga nagkita sila ni Lim sa Thailand niadtong 2015, si Lim nakapakita sa iyang passport nga wala siya sa maong nasud sa mga petsa nga gipasangil.
Si Lim nalandig sa Cebu Doctors’ Hospital sulod sa 45 ka adlaw sugod sa Mayo 16, 2015 hangtud sa Hulyo 2, 2015. Gani una na nga gihimakak ni Espinosa atol sa Senate hearing nga nakaila siya ni Lim ug nadungog lang niya ang maong pangalan gikan kang Jeffrey “Jaguar” Diaz. “So kilala mo si Peter Lim, Ito ba yung Peter Lim na humarap kay President na taga-Cebu?” pangutana ni Senador Emmanuel Pacquiao ngadto ni Espinosa.
“Sa nalaman ko, sa sabi ni Jaguar sa akin noong nag- transaction na pagkatapos na. Kasi nabanggit sa akin ni Jaguar na ‘Pre, may bago tayong boss na si Peter Lim taga dito lang sa atin sa Cebu.’ So iyon. Ang ano ko iyong taga-Cebu na Peter Lim,” tubag ni Espinosa base sa record sa Senate hearing.
Nunot sa maong petisyon, hayan mohunong una ang mga awtoridad sa pagpangita aron dakpon si Lim. (BANAT NEWS)