CEBU, Philippines — Kapin sa 200 ka residente ug mga tag-iya og luna sa Barangay Sta. Lucia ug Tubigagmanok, Asturias ang niprotesta batok sa usa ka quarry operator sa sapa sa ilang lugar.
Ang reklamo gipasaka ni kanhi konsehal Mark Paulus Noel sa buhatan ni Gobernador Hilario Davide III ug gisuportahan sa mga residente diin kadaghanan gikan sa Tubigagmanok.
Usa ka Annabel Villa ang nangayo og Special Disposal Permit apan giingong wala moagi og public hearing samtang ang duha ka barangay ang wala sab niendurso niini.
Nabalaka ang mga residente nga maguba ang sapa nga duol sa ilang kayutaan, kabalayan, taytayan ug tunghaan sa elementarya ug hayiskul.
Ilang gihangyo si Davide nga dili hatagan og permit si Villa tungod sa ilang kabalaka.
Ang ilang suwat reklamo gipasa sa executive assistant ni Davide nga si Mercedita Coca ngadto kang Jayson Lozano, ang pangulo sa Provincial Environment and Natural Resources Office. (BANAT NEWS)