CEBU, Philippines – Ang mga pamilyang naapektohan sa demolition sa Sitio Tangke, Barangay Mambaling, Siyudad sa Sugbo nakigdiyalogo sa Division for the Welfare of the Urban Poor (DWUP) kabahin sa problema nila sa pagpataod og tubig ug kuryente diha sa bag-ong relocation site. Niadtong buwan sa Marso niining tuiga ang lokal nga kagamhanan sa Siyudad sa Sugbo nihatag og relocation site diha sa Barangay Quiot, Pardo sa 200 ka pamilyang naapektohan sa demolition.
Ang matag pamilya gihatagan kini og 28 square meter sa siyudad nga maturokan sa ilang mga balay.
Si Virgina Canoy, presidente sa Tangke Homeowners Association nibutyag nga ang nahisgutang relocation site nahimutang sa tungason nga lugar hinungdan nga maglisod og saka ang tubig diha sa mga linya. Hinuon ang mga yangungo sa nahisgutang mga pamilya lakip na ang problema nila sa kuryente gihatagan kini og pagtagad sa DWUP.
Gawas sa maong problema buot sa maong pamilya nga ang mga sharer ug renter mahatagan usab og luna apan ang operations head sa DWUP Genevieve Alcoseba nagkanayon nga ang maong mga pamilya nga na-demolish lang ang mahatagan og luna ubos sa guidelines nga ilang gisunod. (/BDB)(BANAT NEWS)