CEBU, Philippines — Nimando na karon ang Makati Regional Trial Court pagdakop sa Sugboanong magpapatigayon Peter Go Lim nga gilambigit sa operasyon sa ilegal nga drugas dinhi sa nasud.
Ang paglusot sa warrant of arrest natigayon duha ka adlaw human nasang-at ngadto sa korte ang maong kaso human nakakita og probable cause ang panel of prosecutors nga nalambigit gyud si Lim sa illegal drug trade sa nasud.
“You are directed to execute this warrant without notice necessary delay to arrest the accused, to deliver him to the nearest jail or police station and to report such fact to me, to present himself to me within ten days” pagbasa sa kamandoan sa korte ngadto sa Mabolo Police Station pinaagi ni acting Presiding Judge Gina Bibat - Palamos penetsahan Agosto 14, 2018.
Duha ka kasong kalapasan sa Comprehensive Dangerous Drug Act ang gipasaka kang Lim ug di kini makapiyansa. Si Lim daan nang mihimakak sa mga pasangil kaniya.
Gikatakdang basahan siya sa iyang kaso uban nila ni Kerwin Espinosa, Marcelo Adorco ug Ruel Malindangan karong Agosto 28, 2018 sa hapon. (BANAT NEWS)