CEBU, Philippines — Malinawon ang pagpahigayon sa Regent Aguila Ironman 70. 3 Asia-Pacific Championship nga gihimo diha sa Lapu-Lapu City ug Mandaue City sumala pa sa kapolisan.
Matud pa sa Lapu-Lapu City Police Office director nga si Senior Supt. Limuel Obon kagahapon wala silay nadawat nga mga report sa kasamok nga nakabalda sa maong paugnat sa kusog.
“Na-maintain ang peacefulness (sa city). Naa tay reports nga naay inconveniences but expected na ni siya. We seek their understanding kay panagsa ra man ni sa usa ka tuig,” matud pa ni Obon.
Kapin 1,000 ka mga polis ang gipakatap alang sa seguridad diha sa rota sa mga atleta.
Matud sa kapolisan, gibana-banang 27,000 ka tawo ang nidagsa diha sa event venue sa Shangri-La’s Mactan Island Resort and Spa aron sa pagsaksi kon kinsa ang makalahutay sa lumba.
Sa pikas bahin, gibanabana nga katunga sa gidaghanon sa mga pasaheroan gikan sa Mandaue City nga mobiyahe sa amihanang bahin sa lalawigan sa Sugbo ang wala mamasahero tungod sa Ironman kagahapon.
Si Mardione Aligway sa Command Center sa City Hall sa Dakbayan sa Mandaue nga nahinabi sa Banat News miingon nga hawan kaayo ang kadalanan sa siyudad, gani bisan sa pagbalik og abli sa apektadong kadalanan alas 12:15 menus kaayo ang mga sakyanan.
Ang mga naapektahang dalan mao ang Plaridel Street, A.C. Cortes, Soriano Avenue and F.E. Zuellig Avenue. (BANAT NEWS)