CEBU, Philippines – Nag-atubang og napulo ka kaso sa pagpanglugos ang gidakop sa Barangay Anonang Norte, Dakbayan sa Bogo alas 10 pasado sa buntag sa niaging adlaw.
Si Superintendent Jeffrey Caballes, hepe sa Bogo City Police Station, niila sa dinakpan nga si Jestony Talingting, 25, residente sa maong lugar.
Si Judge Antonio Marigomen sa Branch 61 sa Regional Trial Court (RTC) 7 ang niluwat sa warrant of arrest batok sa suspek human napasaka sa biktima ang kaso sa niaging tuig.
Matud ni Caballes nga ilang giisip ang dinakpan nga most wanted person.
Si Caballes niingon nga sanglit dili makita ang suspek sa ilang panimalay, ilang gihimo ang pagpaniid lang sulod sa nakalabay nga usa ka buwan. Gitanggong na sa selda sa kapolisan ang suspek samtang walay piyansa nga girekomendar ang korte alang sa temporaryo niining kagawasan. (Romeo T. Limpangog/GMR)
Armado sikop sa checkpoint
Nasikop ang 38-anyos nga lalaki nga naghupot og armas ang human walay gipakita nga permit atol sa checkpoint sa may dalan Katipunan, Barangay Calamba, Dakbayan sa Sugbo niadtong Huwebes sa hapon.
Ang nasikop mao si Ruel Sabsal, minyo, taga Barangay Pung-ol Sibugay, bukiran nga bahin sa dakbayan.
Matud ni Police Inspector Albe Codilla nga ilang gipara si Sabsal ug didto nakita ang caliber .45 nga armas niini nga adunay duha ka magazine ug 17 ka bala.
Sumala pa ni Codilla nga walay gikapakita nga dokumento si Sabsal hinungdan nga ila kining gisikop ug kasamtangan nga gitanggong sa selda sa kapolisan diin padayon pa usab nila karon gisusi kung asa gamiton ang maong armas ug kung nagamit na ba usab kini sa mga ilegal nga kalihukan. (/GMR)(BANAT NEWS)