CEBU, Philippines — Ang Bantayan District Hospital giingong wala moagi sa saktong proseso sa pagpamalit niini og medical oxygen tanks base sa Commission on Audit (COA) report.
Sa maong report sa COA giingong nakalapas sa procurement law ang pagpalit sa maong mga ekipo nga mokantidad og P629 mil gikan sa dili rehistrado sa PhilGEPS nga supplier.
Nasuta sa COA nga ang pagbayad ngadto sa Jhakz Medical and Industrial Gases Marketing walay nakabutang nga endorsement.
Ang COA nirekomendar ngadto sa nagdumala sa Bantayan District Hospital nga isumiter tanang rekisitos sa pagpalit og mga ekipo sa tambalanan ngadto sa Bids and Awards Committee (BAC) sa Kapitolyo aron masiguro nga tanang palitonon sa tambalanan maapil sa regular procurement process sa BAC sa probinsiya.
Gipasiguro usab sa COA nga tanang check payments ngadto sa mga supplier ug contractor adunay nakabutang nga "restricted endorsement" nga "for deposit only" subay sa procurement law. Sumala sa COA nga niangkon ang pangulo sa Provincial General Services Office (PGSO) nga si Jon Sepe nga karon pa sila nasayod sa pagpalit sa Bantayan District Hospital sa maong medical oxygen tanks ug kinahanglan nga ang pagpalit sa maong mga ekipo mag-agi gyud sa Kapitolyo sanglit usa lang ang BAC sa probinsiya.
Ang audit team nisugyot nga mag-umol og laing BAC alang sa mga hospital apan ang human resource office sa Kapitolyo nagkanayon nga dili igo ang mga organic personnel sa mga tambalanan nga molangkub sa BAC niini. (/BDB)(BANATNEWS)