CEBU, Philippines – Gawasnon na kagahapong adlawa ang bangkero sa natikyaob nga bangka nga niresulta sa pagkalumos sa tulo ka tawo niadtong Miyerkules sa hapon sa kadagatan sa Madridejos, Lungsod sa Alegria.
Kini human wala mopasaka og kaso ang tagtungod sa mga nangamatay batok kang Jazreel Bendulo, 23, taga Bulacao, Sta. Filomena sa maong lungsod.
Matud ni Cebu Provincial Police Office director, Senior Supt. Manuel Javier Abrugena, nga dili desididong mopasaka og kaso ang pamilya sa tulo ka nakalas nga sila si Rosalyn Peligro, 31; Ruby Peligro, 27, ug kapuyo niini nga si Albert Lopez, 24, taga Sta. Felomina.
Asoy pa ni Abrugena nga dili buot mopasaka og kaso ang pamilya sa nakalas sanglit sila maoy nihangyo sa bangkero nga ihatud sila pauli gikan sa family outing sa Batong Malunhaw Resort sa Alegria. Usa pa sab, naluwas ni Bendulo ang mga bata ug ubang mga hamtong nga luwan sa bangka nga natikyaob human napagngan sa makina tunga-tunga sa lawod ug gihapak ug kusog nga bawod.
Samtang nipahimangno ang Provincial Disaster Risk Reduction and Management Office (PDRRMO) sa mga local government units nga istriktuhon ang pagpatuman sa mga polisiya sa pagpadagan og motorbanca aron malikayan ang susamang insidente.
“Remind nato sila nga magtan-aw sa weather conditions, check engines trouble, ang maintenance and capacity sa bangka o pumpboat ug safety measures like life vest,” matud ni Raphael Luche, hepe sa Emergency and Response Unit sa PDRRMO.
Si Luche nisugyot nga iapil sa curriculum sa mga eskwelahan ang pagtudlo og langoy sa mga tinun-an.
Matud niya nga kini pamaagi aron nga adunay basic nga kahibalo ang mga bata sa paglangoy ug malikayan nga malumos. (Le Phyllis F. Antojado/GMR)(BANAT NEWS)