CEBU, Philippines – Hayan mag-mayoriya na sab ang Barug Team Rama-PDP-Laban sa konseho sa Dakbayan sa Sugbo nunot sa pagtudlo kang Erik Espina isip hulip kang kanhi konsehal James Anthony Cuenco.
Si Espina anak ni kanhi senador ug gobernador sa Sugbo, Rene Espina.
“Of course, great honor for me and of course we also have to respect dili baya lalim you went through the process and mga tawo naghago and I have several names in mind of course even Councilor Raymond Garcia and Mayor Mike Rama of course is also there and then of course Presidential Assistant for the Visayas Michael Dino even Bong Go most importantly Bong Go kinahanglan motan-aw tag utang kabubut-on parte man gud na sa atong kultura ug pagka-Pilipino,” asoy ni Espina.
Karong adlawa molarga siya sa Manila aron pagkuha sa appointment paper kang Presidente Rodrigo Duterte.
Kun makalingkod si Espina, magtabla na sab ang Barug Team Rama-PDP-Laban ug Bando Osmeña Pundok Kauswagan (BOPK) nga adunay tag-siyam ka sakop sa konseho.
Sa habig sa Barug Team Rama mao sila si Konsehal Raymond Garcia, Joel Garganera, Jose Daluz III, Pastor Alcover Jr., Jocelyn Pesquera, Eduardo Rama, Phillip Zafra sa Association of Barangay Councils ug si Espina.
Sa BOPK mao sila si Konsehal Margarita Osmeña, Joy Augustus Young, Alvin Arcilla, Sisinio Andales, Mary delos Santos, Dave Tumulak, Jerry Guardo, Eugenio Gabuya Jr. ug Jessica Resch sa Sangguniang Kabataan.
Matud ni Garcia nga kun magtabla, mayoriya gihapon sila sanglit si Bise Mayor Edgardo Labella ang mobuak sa panagtagbla.
Human sa eleksiyon sa ABC karong Hulyo 30, hayan ang BOPK na sab ang napulo sanglit matagak na si Zafra samtang walo ang Barug Team Rama-PDP-Laban. (/GMR)(BANAT NEWS)