CEBU, Philippines – Nadakpan pinasikad sa search warrant ang 47-anyos nga lalaki kinsa gikatahapang tawo sa usa ka napatay nga drug lord ug nakuhaan og pipila ka armas sa Poblacion East, Moalboal niadtong Lunes sa hapon.
Ang dinakpan giila nga si Jonathan Rosal, minyo ug residente sa maong lugar, kinsa nakuhaan og usa ka granada, usa ka armas nga M11 Ingram nga adunay 20 ka bala, usa ka kalibre .38 ug tulo ka bala, usa ka frontier revolver, usa ka air gun ug duha ka pakete sa gituohang mga dahong laya sa marijuana.
Sumala pa sa hepe sa Moalboal Police Station, Senior Inspector Ramil Morpos, nga base sa ilang monitoring, si Rosal tawo ni anhing Christian Aquino, usa ka drug lord sa Sugbo.
Gituohang human namatay si Aquino ug nabungkag na ang ilang grupo, kang Rosal gibilin ang tanang armas niini.
Niadtong buntag sa Mayo 25, 2017 napatay si Aquino human giingong nisukol og pinusilay sa mga sakop sa Regional Special Operations Group-7 atol sa buy-bust operation sa Bakilid, Dakbayan sa Mandaue.
Si Aquino gihinganlan sa kapolisan nga numero unong high-value target sa tibuok Central Visayas ug giingong tawo sa nisurender nga drug lord nga si Franz Sabalones kinsa hangtud karon gituohan gihapong nagpadagan pa sa iyang ilegal nga negosyo sa shabu.
Samtang nasikop sab ang duha ka lalaki sa may Sitio Dam-an, Pamutan, bukirang bahin sa Dakbayan sa Sugbo human nakuhaan og armas kagahapon sa buntag.
Ang nasikop mao sila si Rodel Alfornon, 27, taga Tisa, Sangi, Toledo City ug Aljun Alfornon, 19, taga Campo 6, Talisay City. Nasakmit gikan sa mga dinakpan ang usa ka home-made .38 revolver nga walay serial number uban sa tulo ka bala ug usa ka homemade .357 revolver Smith and Wesson nga walay serial number nga adunay tulo ka bala. (Rowena D. Capistrano/GMR)(BANAT NEWS)