CEBU, Philippines – Walay mga bakhaw ang gipamutol sa dapit diin itukod unta ang pantalan sa Barangay Sangat, Lungsod sa San Fernando sukwahi sa giingong pasangil ni Mayor Lakambini “Neneth” Reluya.
Sayo pa, si Reluya mipasangil sa port developer nga si Ruben Feliciano nga namutol og mga bakhaw diha sa lugar apan ang maong pasangil gihimakak kini ni Feliciano.
Si Feliciano kinsa maoy presidente sa First Sangat SF International Port Corporation ug miduso sa P12.5 bilyones nga proyekto diha sa lungsod mihimakak usab sa pasangil nga wala siya makatuman sa mga rekisitos nga gikinahanglan alang sa maong proyekto.
Si Jason Lozano, hepe sa Provincial Environment and Natural Resources Office (PENRO) niadtong Martes nibisita sa lugar isip kabahin sa gihimo nilang imbestigasyon mahitungod sa reklamo sa lungsod nga giingong pagpamutol og mga bakhaw.
Matud ni Lozano nga ang nakita nila didto sa lugar mao lang ang mga filling material diha duol sa agianan ug giklaro niini nga walay mga gipamutol nga bakhaw.
Si Lozano nagkanayon nga mohimo sila og report kalabot sa ilang gihimong imbestigasyon ug isumitir nila kini ngadto kang Gobernador Hilario Davide, III. (/BDB)(BANAT NEWS)