CEBU, Philippines – Lima ka bag-ong fire truck gikan sa ulohang buhatan sa Bureau of Fire Protection (BFP) ang moabot sa dili madugay dinhi sa Dakbayan sa Sugbo.
Matud ni Fire Regional Director Samuel Tadeo nga dili momenos sa P7 milyones ang kantidad sa maong mga bag-ong fire truck nga iapud-apod sa mga fire stations dinhi sa dakbayan.
Kadtong mga fire stations nga mahatagan og bag-ong fire truck, kuhaan usab sa ilang mga karaang fire truck aron adto idestino sa ubang fire stations nga menos og fire truck.
Ang pagdugang og bag-ong fire trucks kabahin sa modernization program sa ilang ulohang buhatan. Ang BFP headquarters nagtinguha nga makaangkon og 200 ka bag-ong fire truck aron iapud-apod sa tanang rehiyon. Dinhi sa Central Visayas, adunay bag-ong 14 ka fire stations nga gimugna sa mga dapit nga dugay na nga walay bombero. (/RUB)(BANAT NEWS)