CEBU, Philippines — Hingusgan sa Police Regional Office-7 ang direktiba nga gibilin ni Police Director-General Oscar Albayalde ngadto nila nga pangdakpon na ang mga tambay sa karsada.
Ang tigpamaba sa PRO-7 nga si Supt. Reyman Tolentin niingon nga wala silay nakitang kalisdanan sa maong direktiba sanglit masaligon sila nga mapangitaan kini og maayong diskarte.
“It’s also for their own safety sa mga tambay kay basin og naay mga crimes mahitabo sa area nga sige sila magtambay. At least kung naa sila sa balay, layo sila sa insidente,” si Tolentin niingon.
Subay kini sa mando ni Presidente Rodrigo Duterte sa awtoridad nga panghipuson ang mga tambay ilabi na kun magkalawom ang gabii alang sa seguridad sa publiko.
Rason sa presidente mao nga kasagarang mga istambay, durugista ug mga kriminal maoy gituohang sinugdanan sa krimen diin mabutang sa peligro ang mga “law abiding citizen” nga mangagi. (BANAT NEWS)