CEBU, Philippines – Gitakdang magpadala og draft sa Memorandum of Understanding (MOU) ang kagamhanan sa Probinsiya sa Sugbo ngadto sa Siyudad sa Naga sunod semana labot sa mga kondisyon sa planong pagbaligya sa Balili property.
Si Naga City Mayor Kristine Chiong nakigkita ni Gobernador Hilario Davide III kagahapon alang sa pasiunang panagsabot.
Nipasalig si Davide nga mananghid ang Kapitolyo sa Sandiganbayan nga ibaligya nila ang duol sa 25 ka ektarya nga property. Gikinahanglan ang pagtugot gikan sa Sandiganbayan sanglit ang Balili property adunay kaso nga nalambigitan ni kanhi gobernador Gwendolyn Garcia ug ubang opisyal sa Kapitolyo sa iyang administrasyon.
Si Chiong nagkanayon nga buot paliton sa siyudad ang bahin sa Balili property nga titulado ug walay labot ang mga nahimutang ilawom sa dagat. Wala pay nahisgutang presyo kung pila ang baligya sa Kapitolyo sa maong luna.
Sa laing bahin, ang amahan ni Chiong nga si kanhi mayor Val Chiong, niingon nga P120 milyones ang kantidad nga ilang gisugyot ngadto sa Kapitolyo ug bayran sa kagamhanan sa dakbayan sulod sa tulo ka tuig. (/GMR)(BANAT NEWS)