CEBU, Philippines – Gipahibawo sa Technical Education and Skills Development Authority (TESDA) ang bag-o nilang mga programa ug sistema sa pagtabang sa kabatan-onan sugod karong Hulyo 2018.
Kini sumala pa ni Engr. Winefredo B. Salas, kasamtangang Administrator ug Supervising TESD Specialist sa TESDA-7, atol sa 888 News Forum sa Marco Polo Plaza Cebu kagahapon.
Ubos sa Universal Access to Quality Tertiary Education Act, ang TESDA adunay daghang benepisyo nga ihatag ngadto sa kabatan-onan.
Matud ni Salas nga sugod karong Hulyo, libre na ang mga tinun-an sa TESDA sa mga bayranan sama sa training fees, miscellaneous fees, ID, T-shirts ug uban pang bayranan.
Dugang pa niya nga adunay P160 nga allowance ang mga tinun-an matag adlaw, adunay libreng instructional allowance nga kantidad og P5,000 ug adunay libreng toolkit human sa programa.
Pipila sa mga rekisitos nga tumanon sa pag-enrol sa TESDA mao nga kinahanglang edad og 18-anyos pataas ug dili gradwado sa kolehiyo.
Ang mga programa nga gitanyag sa TESDA mao ang dressmaking, machining, welding, computer numerical controlled lathe machine operation, automobile servicing, computer system servicing, domestic work, housekeeping, electrical, electronics ug refrigeration. (SWU Phinma Intern; Cherry Ann Fornez ug Ericalene Tanudtanud, UV Journalism Interns/GMR)