CEBU, Philippines – Andam na ang mga legal nga dokumento sa mga luna nga napaubos sa Provincial Ordinance 93-1 alang sa pagbayloay niini tali sa Kapitolyo ug sa kagamhanan sa Dakbayan sa Sugbo.
Matud ni Gobernador Hilario Davide III nga ang maong mga dokumento gikatakda na nga iduso ngadto sa Provincial Board nga maoy mohatag og pagtugot kaniya sa pagtuman sa napirmahan nga kasabutan tali nilang Cebu City Mayor Tomas Osmeña.
Atol sa tigum sa Convergence Urban Poor Province Owned Lots (CUPPOL) nga gipatawag ni Davide, natuki nga aduna nay ejectment order nga giluwatan sa korte alang sa mga namuyo sa Lot 14-11 sa Barangay Kalunasan nga gipanag-iya sa probinsiya.
Si Alice Espejo, chairman sa CUPPOL, namahayag nga tumong unta nila nga paliton ang luna nga ila karong giokupahan.
Ang CUPPOL gilangkuban sa 16 ka homeowners associations (HOAs) nga nahimutang sa may Busay, Apas, Banilad, dalan B. Rodriguez ug Capitol Site nga adunay kapin sa 3,000 ka panimalay.
Dugang ni Davide nga ilang unahon paglihok ang 93-1 ug ilang paningkamutan nga mapaspasan kini aron ila na nga matuki ang mga sugyot sa CUPPOL. (Flaire A. Bayalas, CNU Interns/GMR)(BANAT NEWS)