CEBU, Philippines — Nagpahigayon og peace covenant signing ang unom sa pito ka kandidato sa pagka-kapitan kauban sa mga konsehal ug mga kandidato sa Sangguniang Kabataan sa Barangay Mambaling, Dakbayan sa Sugbo.
Si Fr. Mhar Vincent Balili, kura paruko sa Archdiocesan Shrine of San Roque sa Mambaling ang nangulo sa kalihukan.
Ang mga nitambong nga magpapili sa pagka-kapitan mao sila si Atty. Gines Abellana, Emil Hamis, Marlene Aballe, Geraldine Ylaya-Ng, Rudy Atillo ug Ben Manlangit.
Panghinaut sa matag usa ka kandidato nga plataporma lang ang ilang buhaton ug dili maglinabayay og lapok nga pulos pagpangdaut.
Si Balili mapasalamaton sa kalampusan sa gipahigayon nga peace covenant signing.
Malaumon si Balili nga pinaagi sa pagpanumpa sa tanang kandidato atubangan sa Ginoo ug sa katawhan mabatunan ang hapsay ug malinawon nga piniliay.
Human sa pagpanumpa sa mga kandidato gihatagan usab sila og panalangin ni Balili ug ang pagpirma sa tanang nidagan og kapitan lakip ang SK chairman sa covenant isip representante sa ilang partido.
Gitak-upan ang peace covenant signing pinaagi sa paglamanohay sa mga kandidato. (BANAT NEWS)