CEBU, Philippines — Naugbok patay ang usa ka 27-anyos nga Czech national human kini ni-dive gikan sa terrace bisan pa og hunas ang dagat sa usa ka beach sa Barangay Basdiot, Lungsod sa Moalboal niadtong Sabado sa gabii.
Giila sa Moalboal Police Station ang namatay nga si Roman Sgiloda, usa ka Czech, kasamtangang nag-abang og usa ka lawak sa usa sa mga resorts sa maong dapit.
Sa inisyal nga imbestigasyon sa kapolisan, giingong nag-inom ang biktima kauban sa mga higala niining mga Czechs sab.
Nananghid ang biktima nga moadto sa pansayan aron mangihi apan pagkahuman giingong kalit kining ni-dive gikan sa terrace nga nag-atubang sa dagat.
Wala nasayud ang biktima nga hunas na ang dagat niadtong tungora hinungdan nga maayong pagka-ugbok.
Dali nga gidala sa Badian District Hospital si Sgiloda apan gideklarar kini ngadto nga dead-on-arrival. (BANAT NEWS)