CEBU, Philippines – Si kanhi environmental secretary Gina Lopez nagtinguhang tabangan ang mga residente sa isla sa Kinatarcan sa lungsod sa Sta. Fe aron mananom og guso ug lato nga mamahimo nilang panginabuhian.
Matud pa ni Lopez atubangan sa Provincial Board nga gusto niyang magtinabangay sila ni Gob. Hilario Davide III nga tabangan ang mga kabus dinhi sa Sugbo pinaagi sa Public-Private Partnership (PPP) sama sa iyang planong buhaton sa Kintarcan Island.
Si Vice Governor Agnes Magpale mibutyag nga nangayo og otorisasyon si Davide gikan sa Provincial Board aron mosud og kasabotan kang Lopez.
Matud ni Lopez nga ang Cebu adunay 120 ka mga nindot nga isla sama sa ubang mga rehiyon sa nasud, apan sagad sa mga nagpuyo niini mga kabus. Hinungdan nga nakapangutana siya nganong sila kabus nga unta nindot man ang ilang mga dapit?
Gibutyag ni Magpale nga ang usa gustong palambuon ug butangan og seaweed farm sa proyekto ni Lopez mao ang Sitio Laaw, Barangay Hagdan sa maong isla.
Si Magpale usab miingon nga ang proyekto nagpadayon sa pag-uswag. Pinaagi sa Economic Enterprise Council (EEC) nga ang probinsiya migahin og P1 milyon sa Enero karong tuiga alang sa paglambo sa Kinatarcan.
Gipaabot nga ang PB mopasar og usa ka resolusyon nga maghatag og otorisasyon kang Davide nga magpinirmahay og kasabotan kang Lopez.
Matud pa ni Lopez, kaning iyang pagtabang wala’y bayad ug wala siya maningil nga mauli kini, kondili, gusto niyang mokatap kini sa uban pang mga kabus nga komunidad.
Si Lopez mao ang nagpasiugda sa mga livelihood projects sa Buhatan River Eco Adventure, Lola Sayong Eco Surf Camp sa Gubat, Sorsogon ug uban pa. (PIT Intern/IBM)(BANAT NEWS)