CEBU, Philippines – Gidudahang suspek sa carnapping ang nasikop kinsa nabawian og duha ka motorsiklo ug nasakmitan sab og usa ka granada atol sa joint hot pursuit operation sa kapolisan niadtong Biyernes sa gabii sa Dakbayan sa Danao.
Ang suspek giila nga si Dexter Estrada, 21, taga Siyudad sa Mandaue samtang ang biktima mao si Artchel Tero, 41, taga Sudtungan, Basak, Dakbayan sa Lapu-Lapu.
Matud ni SPO1 Joefrey Malagase, desk officer sa Police Station 3 sa Lapu-Lapu City Police Office, nga gi-parking ni Tero ang iyang motor sa kilid sa Sangi New Road apan pagbalik niini nakit-an niya ang suspek nga nagmaneho na sa sakyanan ug nipabulhot palayo.
Nagtinabangay ang kapolisan sa Dakbayan sa Danao ug Lapu-Lapu nga nagpahigayon og joint hot pursuit operation nga gipangulohan ni SPO1 Jacklord Pogoy sa LLCPO hinungdan nga nasikop ang suspek.
Matud ni Malagase nga daan na nga adunay kaso nga carnapping nga natala ang suspek.
Ang suspek pasakaan og kasong carnapping ug illegal possession of explosives. (CNU Intern/GMR)(BANAT NEWS)